.75M ka mga Pinoys dunay epilepsy

   
             [] Subay sa pahayag sa DOH 

ANG Department of Health nagtug-an nga ginaba-banaan sa 750,000 ka mga Pinoy apektado sa sakit nga epilepsy.
Sa uwahing mga adlaw dungan sab sa kasaulugan sa National Epilepsy Awareness Week sa nakalabay nga adlaw, ang DOH nagkanayon nga usa sa tulo ka mga tawo nakasinati sa maong balatian.
Ang sakit mogula sa edad nga 18; samtang katunga sab mag-develop og mga sintomas sa epilepsy pag-abot sa edad nga 25.
Sa tibuok kalibutan, ang maong matang sa sakit mi-apekto sa mokabat 50 milyon ka mga tawo, subay sa report sa DOH. 
Ang DOH nagkanayon nga ang epilepsy usa ka brain disorder inubanan sa magbalik-balik nga seizures nga dunay nagkalain-laing porma, mag-depende sab kini kun unsa ka grabe o kapila ka beses mo-atake ang kombulsiyon.
Mga sintomas niini mao ang kawad-on sa panimuot/consciousness; sensation lakip na panan-aw, pandungog, panlasa, automatic function, mood ug mental function.
Mga eksperto gikan sa health department nagtug-an nga ang epilepsy resulta sa kalit o dili matino nga sobrang electrical discharges sa grupo sa mga brain cells.
Bisan asa nga parte sa utok posible nga ig-on niini.
Ang Epilepsy mamahimo nga mag-develop sa mga tawo nga dunay sakit sa utok, sama sa infection, injury, vascular, tumor, congenital ug degenerative.
Apan, duna say kaso nga dili ma-detect ang brain disorder.
Sumala pa nga kun basehan ang teorya usa sa gihimong sumbanan mao nga ang seizures resulta sa imbalance sa chemical neurotransmitter diha sa utok.
Dugang sa DOH dunay mga ‘provocative’ factors sa pipila ka mga pasyente sa epilepsy sama sa photic stimulation susama sa disco lights, telebsiyon, computers, uban pa.; overbreathing; overhyrdation; kuwang sa tulog, emosyonal, physical stress.
Ang pag-atake sa epilepsy mag-depende sab, kun kini ba ka-usa ka beses sa usa ka tuig uban pa. 
Dugang pahimangno sa DOH nga pinaagi sa epektibo, dili kaayo mahal nga mga  anti-epileptic medications karon, gipahimangnuan ang publiko nga moduol og doktor aron nga kahatagan og sakto nga medikasyon.
Subay sa ilang istatistika nakita nga 70 porsiyento sa mga bag-ong diagnosed nga mga kaso, malampuson nga natambalan tungod sa padayon nga medikasyon.
Ang DOH mipahimangno nga panahong atakehon ang pasyente mas maayo nga dili bantayan sila pag-ayo, ihilayo ang mga butang nga makasamd kanila, butangan sab og busal ang ilang baba aron nga dili niini aksidente nga mapaakan ang ilang dila.
Ang pagsuta sa iyang ginhawa gikinahanglan sab hilabi na og mawad-an sa panimuot ang pasyente.
Dugang pa, magbutang og flat, humok sama sa gipiko nga jacket ilawom sa ulo sa pasyente.
Kun magpadayon gihapon ang pag-atake sa pasyente mas maayo nga mokunsulta na og doktor. (PIA)