Pagpasuso sa mga bata gikampanya

 [] Nunot sa nahitabong ‘melamine contamination’ sa mga gatas nga gikan sa Tsina.

TUNGOD sa balitang kontaminasyon sa melamine diha sa mga produktong gatas nga gikan sa nasud Tsina, lakip na padayon nga pagsaka sa presyo sa mga infant formula, mga ginikanan partikularmente mga inahan gi-awhag nga i-breastfeed na lamang ang ilang mga anak.
Sumala pa nga ang gatas sa inahan dili lang mohatag og benepisyo sa panglawas sa mga masuso, inahan apan duna sab kini’y economic benefits sa mga ginikanan tungod di na kinahanglan pa nga mogasto og dugang aron nga ipalit og gatas.
Sigun sa World Health Organization (WHO) ug United Nations International Children’s Emergency Fund (UNICEF), nga ang pagpasuso gamit ang gatas sa usa ka inahan dunay daghang benepisyo, adbentahe kun itandi sa mga infant formula.
Wala sumala pa’y infant formula nga naglangkub sa perpektong kombinasyon sa protina, carbohydrates, ug fats nga motabang aron mapalambo ang brain development nga ginahimo sa gatas gikan sa inahan.
Dugang pahayag sa WHO ug UNICEF nga ang gatas sa usa ka inahan dunay antibodies nga mopanalipod sa bata kontra impeksiyon.
Alang sa mga inahan nga dunay trabaho, ang duha ka ahensiya nagsugyot nga ibutang ang ilang gatas sa limpyo nga containers aron mao kini’y ipakaon sa ilang anak.
Ang mga expressed milk sumala pa molungtad ngadto sa walo ka oras kun sakto ang pagbutang niini sa room temperature.
Sa susamang katuyuan, ang  Department of Education nagklaro nga sila wala manghatag og gatas sa mga estudyante.
Gihimo ang pagtin-aw nunot sa taho nga sila nanghatag og gatas isip kabahin sa Food for School Program (FSP) kun diin ang mga gatas sumala pa gikan sa Tsina og posible nga kontaminado sa toxic chemical nga melamine.
Si Education Secretary Jesli Lapus nagklaro nga ang DepEd feeding program naga-distribute lang og bugas inubanan sa biscuits, champorado, arroz caldo, ug egg-fortified noodles.
“There should be no cause for panic. Foods we provide in our feeding program are safe from melamine”, ni Lapus.
Ang Food for School Program (FSP) usa ka P5.3-billion project sa administrasyong Arroyo.
Tumong niini nga masulbad ang suliran sa kagutom diha sa mga pamilya nga anaa sa probinsiya.
Mohatag kini sa mga bata og tag usa ka kilo sa iron-fortified nga bugas matag klase sud sa 120 diyas sa school year.
Bag-uhay lamang gi-undang sa kagamhanan ang pag-import sa tanang klase sa gatas gikan Tsina human migula ang taho.
Tungod sa melamine contamination pipila na ka mga kabataan sa China ang nasakit, duna na say nakutluan sa ilang kinabuhi.
Sa kasamtangan ang Bureau of Food and Drugs (BFAD) mihimo na og laboratory tests sa tanang imported milk products hilabi na ngadto sa mga produkto nga gi-manufacture sa China.
(PIA)